Ĉu vi ankaŭ konas tion? Estas nelonga tempo ĝis kristnasko aŭ ĝis iu
naskiĝtago, kaj vi tute ne havas ideon kion doni al via Esperantista
amiko. Ne senesperiĝu! Ĉi tie vi trovos kelkajn proponojn kion donaci,
ne nur por la kristnaska festo.[^1]
-
La klasikaĵoj
Memfaritaĵoj kaj libroj ĉiam funkcias – eble speciale ĉe viaj verdaj
amikoj kiuj aprezas diversecon, individuecon kaj, nu, lingvumadon.
Ĉi tie mi ne proponu verajn specifaĵojn, ĉar kompreneble ege
dependas de propraj ŝatoj kaj de via rilato al la donacricevonto: Vi
povas pentri, brodi, triki, verki, faldi, kaj multe pli. Rilate al
libroj, vi trovas kelkajn rekomendojn en la eldono 2015/4 de la
Esperanto aktuell, kaj ekzemple la libroservo de la UEA ofertas
specifan retpaĝon pri novaj varoj[^2], dum ĉe la libroservo de la
GEA vi povas vidi liston de libroj haveblaj je reduktitaj
prezoj^3.
-
La mondo
Esperanto estas (kaj ĉiam estu pli) tutmonda lingvo. Kaj pro tio
multaj Esperantistoj ŝatas vojaĝi al diversaj lokoj kaj informiĝi
pri fremdaj landoj. Por tio, termapoj ĉiam estas bona ideo. Unu vere
uzebla estas la Gratmapo^4 (Scratch Map): Vojaĝemuloj povas
forgrati aŭrofolian tavoleton de la jam vizititaj lokoj kaj aperigi
la kolorojn sub tiu tavoleto, samtempe registradante kiom ili jam
vidis de la tero.
Dua mojosa mapo estas la Tutmonda Metroomapo[^5] (World Tube
Map): Ĝi haveblas en diversaj grandecoj kaj montras la urbojn de la
mondo kiel imagitan metroosistemon. Tio do estas bonkonata stilo
bele aplikita.
-
Lingvoj
Eble viaj Eperantistaj amikoj ankaŭ ŝatas lerni aliajn lingvojn? Kio
do pri aĉeti por ili lingvokurson aŭ lernolibron? Ĉi tie ekzistas
ege multaj opcioj, se vi nur scias pri kiu lingvo temu ekzakte. ;)
Tie helpas nur demandi!
Mi opinias ke specife se la objekto de lernemo estas iu konstruita
lingvo, vi povos ĝojigi homon per tiuspeca donaco – vidu ekzemple la
Vortaron de la Klingona^6 aŭ la libron Vivanta Lingvo: La
Dotrakia[^7] (Living Language: Dothraki).
-
..Ĝirafoj?
Tio eble ŝajnas senrilata, sed certe vi kaj la pridonacotulo konas
ĉies plej ŝatatan Esperantan vortludon: Kial ĝirafo neniam estas
sola? ––– Ĉar ĝi havas kolegon! Nia lingvo vere havas rilatojn al
ĉiuj ajn aspektoj de l' vivo. Kaj troveblas multaj belaj aŭ utilaj
donaceblecoj ĝirafoformaj! Specife mi povas proponi la Trinkujon
Ĝirafblekan^8 (Giraffe Moo) aŭ – se vi ne hezitos elspezi iom
pli da mono – la Ĝiraflibroapogilojn^9 (Giraffe Bookends).
-
Kaj fine…
…vi povas fari donacon tre specialan, pleje ĉar ĝi estas daŭra
donaco: membreco en la Germana Esperanto-Junularo. Tiu mebreco
havas, kiel vi verŝajne scias, kelkajn avantaĝojn; interalie la
dumonatan ricevon de via kune. La kotizojn vi trovos
interrete.[^10] Ĝojon do disdonu per tiu bonege Esperantisma faro!
Nun nur restas al mi deziri al vi bonajn tagojn kaj multan ĝojon al ĉiu
donacanto kaj donacricevanto!
[^1]: Kun la obligacia rimarko ke vere nur estas proponoj; nek mi nek iu
alia el la kune-teamo profitas finance aŭ alie se vi aĉetas iun el
la specife nomataj eksteraj artikloj. Nun ĝoju la legadon :)
[^2]: e-lingva: http://katalogo.uea.org/index.php?st=novaj
http://www.esperanto-buchversand.de/kategorien/je\_reduktitaj\_prezoj.html
https://www.luckies.co.uk/gift/scratch-map-personalised-world-map-poster
[^5]: anglalingva: http://www.firebox.com/product/6205/World-Tube-Map
http://www.buecher.de/shop/star-trek/star-trek-das-offizielle-woerterbuch-ebook-epub/okrand-marc/products\_products/detail/prod\_id/38584910/
[^7]: anglalingva: http://www.livinglanguage.com/dothraki
http://yas-ming.mysupadupa.com/collections/moo-cups/products/moo-cup--3
https://www.etsy.com/listing/92351476/giraffe-metal-art-bookends-free-usa?ref=shop\_home\_active\_3
[^10]: germanlingva: http://www.esperanto.de/de/dej/mitgliedschaft
